ஜோதிபாரதியின் கவிதைகள்

தமிழர்களுக்கு செவி சாய்க்காத இந்தியா, இனப்படுகொலையை மூடி மறைக்க முயற்சி

2009-05-28T06:43:00.000-07:00

விடுதலைப் போரை வேரறுத்து, மனித உரிமைகளை மரிக்கச் செய்யும் இந்தியா

இலங்கையில் விடுதலைப்புலிகளை அழிக்கிறோம் என்ற பெயரில் சிங்கள ராணுவம் பல்லாயிரக்கணக்கான அப்பாவி தமிழர்களை கொன்று குவித்தது.

இதுபற்றி ஐ.நா. சபையில் மனித உரிமை குழு விசாரணை நடத்தவேண்டும் என்று மனித உரிமை சபையில் தீர்மானம் கொண்டு வரப்பட்டது.

சுவிட்சர்லாந்து, ஜெர்மனி, இங்கிலாந்து, பிரான்சு, இத்தாலி போன்ற நாடுகள் முயற்சியால் இந்த தீர்மானம் விவாதத்துக்கு எடுத்து கொள்ளப்பட்டது.

கடந்த 2 நாட்களாக ஜெனீவாவில் உள்ள ஐ.நா. சபை மனித உரிமை ஆணையத்தில் விவாதம் நடந்தது.

தொடக்கத்தில் இருந்தே தீர்மானத்துக்கு எதிராக அதே நேரத்தில் இலங்கைக்கு ஆதரவாக இந்தியா நடந்து கொண்டது. இதேபோல சீனா, பாகிஸ்தான், மலேசியா போன்ற நாடுகளும் இலங்கையை ஆதரித்தன.

நேற்று இரவு ஓட்டெடுப்பு நடந்தது. தீர்மானத்துக்கு ஆதரவாக 17 நாடுகளும், எதிர்த்து இந்தியா உள்பட 22 நாடுகளும் ஓட்டு போட்டன. இதனால் தீர்மானம் தோல்வி அடைந்தது.

எனவே மனித உரிமை மீறல் பற்றி ஐ.நா.சபை மனித உரிமை குழு விசாரணை நடத்த தேவை இல்லை.

இந்த தீர்மானம் வந்ததுமே இலங்கை பல்வேறு நாடுகளையும் தங்களுக்கு ஆதரவாக ஓட்டு போடும்படி கேட்டுக்கொண்டன. அதற்கு நல்ல பலன் கிடைத்து உள்ளது. மனித உரிமை குழுவில் உறுப்பினராக உள்ள 47 நாடுகளில் இந்தியா, பாகிஸ்தான், சீனா, மலேசியா, இந்தோனேசியா, ரஷியா, கியூபா மற்றும் ஆப்பிரிக்க நாடுகள் உள்பட 22 நாடுகள் இலங்கையை ஆதரித்து உள்ளன.

சுவிட்சர்லாந்து, ஜெர்மனி, இங்கிலாந்து, பிரான்சு, இத்தாலி, கனடா, சிலி, மெக்சிகோ உள்ளிட்ட 17 நாடுகள் இலங்கைக்கு எதிராக ஓட்டு போட்டன. 8 நாடுகள் ஓட்டெடுப்பில் கலந்து கொள்ளவில்லை.

இந்த தீர்மானத்தில் இலங்கையை ஆதரித்து இந்தியா ஓட்டு போடக்கூடாது என்று தமிழகத்தில் இருந்து கோரிக்கை விடப்பட்டது. அதை புறக்கணித்து இந்தியா இலங்கையை ஆதரித்து உள்ளது.

இதே விவாதத்தின்போது இலங்கை தனது நாட்டு மறு சீரமைப்புக்கு சர்வதேச நாடுகளின் நிதி உதவியை கோரும் தீர்மானத்தையும் கொண்டு வந்தது.

இந்த தீர்மானத்துக்கு ஆதரவாக இந்தியா உள்ளிட்ட 24 நாடுகள் ஓட்டு போட்டன. ஐரோப்பா நாடுகள் உள்ளிட்ட 12 நாடுகள் எதிர்த்து ஓட்டு போட்டன. இதனால் தீர்மானம் வெற்றி பெற்றது. எனவே இலங்கைக்கு சர்வதேச நிதியுதவி தாராளமாக கிடைக்கும் நிலை ஏற்பட்டுள்ளது.

கறுப்பு ஆடுகள்

2009-05-28T05:23:00.000-07:00

வளர்த்து விட்டோம்

நமக்குத் தெரிவதில்லை

பேரம் படிந்து விட்டால்

சோரம் போய்விடும்

கறுப்பு ஆடுகள்

அய். நாவில் குப்பை கொட்டும் பொய் நா(ய்)(க்)கள்

2009-05-22T02:57:00.000-07:00

அய். நாவில் குப்பை கொட்டும் பொய் நா(ய்)(க்)கள்

அய். நா சபைக்கு யார் தலைமை செயலாராகத் தகுதி படைத்தவர்கள் என்பது உலக மக்களுக்குத் தெரிய வாய்ப்பில்லை. எனென்றால் அவர்களை மக்கள் நேரடியாகத் தேர்ந்தெடுப்பதில்லை.(நேரடியாக தேர்ந்தெடுப்பவர்களுக்கே துரோகிகளைத் தெரிவதில்லை)

ஓர் இனப்படுகொலையை திட்டமிட்டு வேடிக்கை பார்க்கும் மனிதாபிமானமற்ற மனிதப் பிறவிகள் இந்தப் பதவிக்கு வர தகுதியற்றவர்கள் என்பது மட்டும் நமது பார்வையில் தெரிகிறது. அவர்களுக்குத் துணையாக இருப்பவர்களும் மனிதாபிமானமற்ற ஈனப்பிறவிகளாக இருப்பது இவ்வுலகில் மனிதம் மரித்துக் கொண்டிருப்பதை புலப்படுத்துகிறது. அதற்கு இந்த முன்னாள் தலைமை செயலாளரின் கோரிக்கை ஓர் எடுத்துக்காட்டு.

ஐக்கிய நாடுகள் சபையின் முன்னாள் பொதுச் செயலாளர் கோபி அன்னான் இலங்கை அரசாங்கத்திடம் கோரிக்கை விடுத்துள்ளார். செய்தித்தாள் ஒன்றுக்கு அவர் அளித்துள்ள பேட்டியின் வாயிலாக அவர் கோரிக்கை விடுத்துள்ளார்.

யுத்தத்தில், வெற்றிகள் பிரச்சினைகளின் தீர்வாக அமையாது என்பதை அரசாங்கம் முதலில் புரிந்து கொள்ள வேண்டும்.

போரினால் பாதிக்கப்பட்டுள்ளவர்களின் இழப்புகளை ஈடு செய்வதன் வழியாகவும் அவர்களை அவசரமாக நல்ல நிலைக்கு கொண்டுவருவதன் மூலமாகவும்தான் தீர்வுக்கு கொண்டுவரமுடியும்.

இலங்கை அரசாங்கம் அப்படி செய்யத்தவறினால் வருங்காலத்தின் பெரும் நெருக்கடிகளை சந்திக்க நேரிடும்’’ தெரிவித்துள்ளார்.

சிங்கப்பூர் - சந்திப்பு - கானா பிரபா

2009-05-13T07:19:00.000-07:00

அன்பின் சிங்கை வாழ் வலையுலகத் தோழமைகளே,

நமது சக பதிவர் மடத்துவாசல் பிள்ளையாரடி றேடியோஸ்பதி திரு கானா பிரபா அவர்கள் தற்போது சிங்கப்பூர் வந்துள்ளார். நம்மையெல்லாம் சந்திக்க ஆவலாக இருக்கிறார். நாளை(14.05.2009) இரவு 7.30 மணிக்கு காரைக்குடி உணவகம் அருகே உள்ள காளி அம்மன் கோவிலுக்கு அருகே சந்திக்க முடிவு செய்துள்ளோம். இயன்றவர்கள் கலந்துகொள்ளலாம்.

நன்றி!

தகவலுக்கு நன்றி திரு வடுவூர் குமார்

பலிபீடம் பாருக்குள்ளே நல்ல நாடாகும்!

2008-10-15T17:26:00.000-07:00

விடிவெள்ளி தெரிகிறது

வந்து பார்

உன் நிலத்தின் பொழியை

நீயே அளந்து கொள்வாய்

நீ உழுது நட்ட பயிர்

கதிரானதும்

நீயே அறுத்து

உன் குதிரில் இடுவாய்

நீ சேர்த்த சொத்து

உன்னோடு இருக்கும்

சொல்லிக்கொள்ளாமல்

அள்ளிக்கொண்டு ஓடும்

நிலை மாறும்

உன் இடத்தில் நீ உலவ

உதவாக்கரை ஒப்புதல்

தேவையில்லை

வேடர்கள் வீழ்ந்து போவர்

வெள்ளி நிலா உலவும்

விண்மீன்கள் சாமரம் வீசும்

வேங்கைகள் நாடாளும்

வீர மறக் கொடி பறக்கும்

தமிழ் வெள்ளம் அருவியாகும்

பாலாறாய்ப் பெருக்கெடுக்கும்

மல்லிகை

மண மணக்கும்

மாஞ்சோலைக்

குயில்கள் கூவும்

வண்ணமயில்

தோகை விரித்தாடும்

உன் பூமியில்

காகம் மட்டுமே கரையும்

ஓலங்கள் ஒழிந்து

ஏலங்கள் குவியும்

துயரங்கள் துடைத்து

துலாபாரம் பெருகும்

கள்ளிச் செடிகளும்

கவி பாடும்

பூங்கொத்துகள்

புன்னகை

பரிமாறிக் கொள்ளும்

தென்றல் மட்டும்

உன்னைத் தீண்டும்

வானவில் உனக்குத்

தோரணம் கட்டும்

மேகங்கள்

பன்னீர் தெளிக்கும்

முல்லைப் பூக்களுக்கும்

முடிசூட்டப்படும்

நீ நாடிய நாடெல்லாம்

உன் நாட்டை நாடும்

பூவரசு

பொன்னரசாகும்

வையம் போற்றும்

வல்லரசாகும்

எள்ளி நகைத்தவர்

ஏமாந்து போவர்

விதைக்காமல்

முளைக் கொட்டும்

பலிபீடம்

பாருக்குள்ளே நல்ல நாடாகும்

என்று வாழப்போகிறாய் மானத்துடன் மனித இனமாய்...!?

2008-04-17T14:58:00.000-07:00

இறுகிப்போன இதயத்தில்

அருகிப்போன குருதி.

தேங்கி நிற்கிறது -நாங்கள் இங்கு

ஏங்கி நிற்கையில்.

தேக்கிய தண்ணீரில்

தீர்ந்து போனது

உன் தாகம் மட்டுமல்ல

மனித நேயமும் தான்.

மணமோடு வாழாவிட்டாலும்

பிணமாக வாழ்ந்தெதைக் கண்டாய்?

சினமும் சீற்றமும்

பிணத்துக்கும் வருமோ?

தண்ணீர் கேட்டால்

வேதனையில் வெந்நீர் ஊற்றும்

வெற்றுக் களிமண் நீ!

தொற்று நோயாய்

எங்கள் வாழ்வில்!

என்றென்றும் வாலாட்டும்

வானரமாய்!

நாளெல்லாம்

நச்சரிக்கும் நரி நீ!

வரிந்து கட்டிக்கொண்டு

நிற்கிறாய் மானம் இழந்து!

இனத்திற்கு மானமுண்டு

பிணத்திற்கு மானமுண்டோ?

என்று வாழப்போகிறாய்

மானத்துடன் மனித இனமாய்...!?

அன்புடன்,
அத்திவெட்டி ஜோதிபாரதி.

வழிந்தோடிய வறட்டு கௌரவம்...!

2008-04-15T20:46:00.000-07:00

வழிந்தோடிய வறட்டு கௌரவம்

வழியாத விழிகளும்

வழிமேல்

விழி வைத்தது -அவள்

வருவாள் என.

வந்தவள் -ஒரு

வார்த்தை கூட பேச

வசதியாக மறந்து போக,

வறட்டு கௌரவம்

வழிய போய்

வழிந்துவிட்டு வந்தது.

வழியே வந்தவர்கள் -ஒரு

வழியாய் பார்க்கும் சமயத்தில்...!

அன்புடன்,
அத்திவெட்டி ஜோதிபாரதி.

வண்டுகளுக்குக் காத்திருந்த மலர்!

2008-04-05T22:15:00.000-07:00

வண்டுகளுக்குக் காத்திருந்த மலர்!

பூவின் இதழ்களைத்

தொட்டுத் தொட்டு

தேனெடுத்த வண்டு

பூவுக்கு வியர்த்திருந்ததால்

வெண் சாமரம் வீசத்

தவறவில்லை

பூவின் இதழ்கள்

சிறகடித்து

வண்டைப் பறக்கச் செய்து

அயல் மகரந்தச் சேர்க்கைக்கு

அனுப்பி வைத்துவிட்டு

அடுத்த வண்டின் வருகைக்காகக்

காத்திருந்தது.

அன்புடன்,
அத்திவெட்டி ஜோதிபாரதி.

பூந்தோட்டத்தில் சாதிமல்லிப் பூச்செடிகள்

2008-04-03T21:07:00.000-07:00

பத்தியிலே பாத்தி

பந்தியும் உண்டு தண்ணீர்.

தோட்டக்காரன்

இறைக்க இறைக்க குடித்தது

ஒரு சாதிமல்லி.

இறைக்காமல் குடித்துவிட்டு

இளக்காரமாகப் பார்த்தது

இன்னொன்று.

கவலையே படாமல்

இருந்த மற்ற சாதிப் பூச்செடிகளை -வேர்

கரையான் அரித்துத் தின்றது.

அத்திவெட்டி ஜோதிபாரதி

வழியும் குறுக்கீடும்

2008-04-03T01:19:00.000-07:00

எனது தடத்தைப்

பார்த்துக்கொண்டு போனேன்

எதிரே வந்தவர்கள்

ஒதுங்கி வழிவிட்டார்கள்.

எதிரே வந்தவர்களைப்

பார்த்துக் கொண்டு

போனபோது,

அவர்கள் எனக்கு

வழி விடவில்லை.

நான் ஒதுங்கிப் போக

வேண்டியதாகிவிட்டது.

அன்புடன்,
அத்திவெட்டி ஜோதிபாரதி.

தயக்கத்துக்கு முதல் அடி வைத்தாகிவிட்டது

2008-03-20T16:37:00.000-07:00

எட்டு மாதக் குழந்தை

எடுத்தடி வைக்க

நடைவண்டியில்

நடை பயணம்

மகிழ்ச்சி ஆரவாரத்தில்

மருண்டு தள்ளியதால்

வண்டி குழந்தையை

இழுத்துக்கொண்டு நின்றது

அம்மா அப்பாவின்

ஆரவாரத்துக்கிடையே

வைக்காத முதல் அடியை

வைத்தது குழந்தை

அத்திவெட்டி ஜோதிபாரதி

விருந்தும் மருந்தும்

2008-03-19T17:09:00.000-07:00

வீட்டிற்கு வந்த

ஆசிரியருக்கு

விருந்தோம்ப

ஏதுமில்லை என

வெதும்பிய

கலைச்செல்வன்

அவசரமாகத் தென்னை

மரமேறி இளநீர்

பறிக்கையில்

விழுந்தது இளநீர்

அவனையும் பறித்துக்கொண்டு.

அவசரச் சிகிச்சைப் பிரிவில்

சேர்த்த ஆசிரியர்

பிரியா சோகத்துடன்.

அன்பு மட்டும்

வெளிப்பட்டது

சாரை சாரையாக...!

அத்திவெட்டி ஜோதிபாரதி

சம்மந்திகளின் பிரசவ வேதனை

2008-03-19T08:53:00.000-07:00

பிரசவ அறையில்

பிரசவ வேதனையில்

துடித்துக்கொண்டிருந்த பெண்

மருத்துவரையும் தாதிகளையும்

உதைத்தார்.

சாத்தப்பட்ட

அறைக்கு வெளியே

சாந்தமாகக் கணவன்.

ஆண்குழந்தை தான் -இல்லை

பெண்குழந்தை தான் -என

சம்மந்திகளின் சண்டை.

நான் தான்

முதலில் குழந்தையைப்

பெற்றுக்கொள்வேன் என்ற

கூக்குரல் வேறு.

வேண்டாம் வம்பு என்று

வெறுமனே நின்ற

கணவனிடன் கொடுத்து

கைப்பணம் பெற்றுக்கொண்டார் தாதி.

ஆறு மாதத்திலேயே தெரியும்

ஆண் பிள்ளை என்று

அழகாய் உரைத்தார்

குழந்தையின் தந்தை.

அத்திவெட்டி ஜோதிபாரதி

செக்குமாடு

2008-03-18T19:43:00.000-07:00

செக்குமாடு

கீறல் விழுந்த

இசைத்தட்டு

ஆர வட்டம்

அழியாக் கோலம்

சுகமென நினைத்து

சுற்றிச் சுற்றி

சூடான எண்ணெய்

வழ வழப் பிசுக்குடன்

பிழிந்தாலும் வராது

சுரண்டினாலும்

வராத புண்ணாக்கு

வெல்லம் மட்டும் கேட்டது

செக்கு மாடு

அத்திவெட்டி ஜோதிபாரதி

சறுக்கிய தேசத்திற்கு நறுக்கு வினாக்கள்

2008-03-14T04:43:00.000-07:00

தினம் தினம்

கழுகாய் பருந்தாய்

வட்டமிடும்வஞ்சக வானூர்தி

கருவறுக்க

கோழிக்குஞ்சாய்

எம் மக்கள்

இடிமுழக்கம் எங்கு பார்த்தாலும்

ஈழத்தமிழகத்தில் -குண்டுகளை

அள்ளி எரிந்து ஆர்ப்பரிக்கும்

அரக்கர் கூட்டம்

கைக்கெட்டும் தூரத்தில்

எம் உறவுகளின் தாய்த்தமிழ்நாடு

கேட்காமல் கேட்கும்

எம் உறவுகளின் ஓலங்கள்

இவன் வாழும் நாடோ காந்தியின்

அகிம்சை வழி

நேருவின் சமாதனப்புறா-அதுவோ

முதுகில் அடித்தவனை

முழுவதும் தொழும்

தாய்த்தமிழ் நாடென்ற பேர் எதற்கோ?

கூட்டுப் பயிற்சியும்

கொஞ்சிக்குலாவலும்

நம் குல நாசம்

செய்வதற்கேயன்றி வேறெதற்கு?

ரகசியப் பேச்சுக்களும்

ராடார் தளவாடங்களும்

ஒளிவு மறைவற்ற

ஒப்புதல் வாக்குமூலங்களும் -எம்

நலிவடைந்த உறவுகளை

நசுக்கத்தானே?

சமாதானம் என்று சொல்லி

சவ வண்டியனுப்பும்

சறுக்கிய தேசத்தின்

ஆற்றாமைத் தமிழன்

அழுகிறான் இங்கே

அவனுக்கு நாடிதுவே

வேறில்லை அவனியிலே

கண்ணீருக்கு தாழ்ப்பாள் போடும்

கயவர்கள் கூட்டம்

கட்சிக்கொடி ஏந்திக்

கல்லாக்கட்டும்

உள்ளொன்று வைத்து

புறமொன்று பேசும்

ஒப்பனைத் தமிழன்

ஒளிரா நிலவு அமாவாசை

உணர்வில்லா உறக்கம் பாவம்

உடுக்கை மானம் உண்டோ அறியேன்...?

அத்திவெட்டி ஜோதிபாரதி

எழில் நிலா இணைய இதழ் 29.03.2008
பதிவுகள் இணைய இதழ் ஏப்ரல் 2008
லங்காஸ்ரீ கவிதைகள் இணைய இதழ் 31.03.2008

தன்னை மறைத்துக்கொண்ட நிர்வாணம்!

2008-03-13T02:41:00.000-07:00

வெள்ளையைப் பார்த்து

வெளிரிப் போனது

தன் நிறம் மறந்து

மஞ்சளைப் பார்த்து

மறைத்துக் கொண்டது -தன்

மகிமையை

கறுப்பைப் பார்த்து

கவிழ்ந்து விட்டது

கடைச் சரக்காகி

சாயம் வெளுத்துக்கொண்டு

மகிழ்ந்திருந்தது

தன்னையே மாற்றிக் கொண்டு

சமூகப் பண்பாடு மறந்த

மாந்தளிர்...!

அத்திவெட்டி ஜோதிபாரதி

வார்ப்பு இணைய இதழ் 31.03.2008
கீற்று இணைய இதழ் 01.04.2008
முத்துக்கமலம் இணைய இதழ் 02.04.2008
பதிவுகள் இணைய இதழ் ஏப்ரல் 2008
லங்காஸ்ரீ கவிதைகள் 18.03.2008

நிற்காமல் நின்றுகொண்டு...

2008-03-12T01:02:00.000-07:00

பள்ளி விட்டதும்

எங்கும் நிற்காமல்

வீட்டுக்கு வந்துவிடு

அம்மா சொன்னது

மனதில் ஒலித்தது

காத்திருந்தேன் பேருந்துக்காக

இருட்டியதும் வந்தது

பேருந்து இறுமாப்புடன்

இடம் கிடைக்குமா என்ற

ஏக்கத்துடன் படியில்

உந்தி ஏறியதும்

நிற்காமல் பறந்தனர்

நடத்துனரும் ஓட்டுனரும்

மதியம் உண்ட களைப்பில்

மயங்கிப்போய் நான்

இருக்கையில் இருக்க

இடமில்லாமல்

நின்று கொண்டே விழுந்தேன்

தூக்கம் சொக்கியதும்

இடம் வந்ததும்

இறங்கிக்கொண்டேன்

எதுவுமே தெரியாத இருட்டு

இருந்தாலும் கண்டேன்

தெரியாத தெருவும்

எரியாத விளக்கும்

அதற்குத்தான்

தெருவிளக்கென்று பேரோ?

கும்மிருட்டில் காத்திருந்த

சிற்றொளிக் கைவிளக்கு

தம்பி என்று தழுவிக்கொண்டது

என் தாய்.

அத்திவெட்டி ஜோதிபாரதி

வார்ப்பு இணைய இதழ் 03.03.2008
கீற்று இணைய இதழ்

நெஞ்சு பொறுக்குதில்லையே

2008-03-08T21:37:00.000-08:00

வேற்று மொழியில்

பேசிக்கொண்டு வந்த

தமிழர்கள் இருவர்

இடையிடையே

தன் தாய்த் தமிழில்

காய்களை மட்டும்

கடித்துத் துப்பினார்கள்

அக்கம் பக்கத்தினருக்கு

மட்டும் கசந்தது

அத்திவெட்டி ஜோதிபாரதி

பேராசை

2008-03-07T20:17:00.000-08:00

ஆஸ்தி உள்ளவனுக்கு

அஸ்தி கரைக்க

அகர வரிசையில்

ஆயிரம் பேர்

அத்திவெட்டி ஜோதிபாரதி

முன்னுக்கு வாருங்கள்

2008-03-07T03:46:00.000-08:00

என்னைப் பின்பற்றுகிறவர்களை

எனக்குப் பிடிக்காது

கழுதை

அத்திவெட்டி ஜோதிபாரதி

மாசமோ மார்கழி மாசம்

2008-03-06T16:16:00.000-08:00

பார்த்தேன் ரசித்தேன்

பசுமையானவளை

அவளுக்கு வியர்த்திருந்தது

வெண்பனியோ என்று

நினைத்துக் கொண்டேன்

நான் தொட்டவுடன்

வெட்கப்பட்டாள்

தொட்டாற் சுருங்கி

அத்திவெட்டி ஜோதிபாரதி

என்னை மறந்துவிட்டீர்களே?

2008-03-05T20:10:00.000-08:00

வேகாத வெயில்

வெந்த தணல்

தண்ணீரே இல்லை

என்னை நினைத்து

எத்தனை கூக்குரல்கள்

ஒரு மழை பெய்ததும் -ஏன்

என்னை மறந்து விட்டீர்கள்?

காவிரிப் பிரச்சனை

அத்திவெட்டி ஜோதிபாரதி

சிங்கப்பூர் ஜுரோங் தீவு

2008-03-04T16:17:00.000-08:00

சிங்கை ஈன்றெடுத்தக் குழந்தை
சிங்கை இராணுவத்தின் தத்துப்பிள்ளை

மண்ணால் உருவான
மாபெரும் சமுத்திரம்

சிறப்பு அனுமதியுடன் -ஒரு
சிறிய பயணம்

கப்பல் பட்டறைகளின்
கற்பனை உலகம்
கற்பனை செய்ய முடியாக் களப்பணிகள்

சாரக்கட்டுகளில் சறுக்கு விளையாட்டு
கோரம் நடக்கும் என குறி கூட தெரியாமல்

கொடிய வாயுக்களிடம்
குசலம் விசாரிப்பு

எல்லா வேலைகளும் இங்கு கிடக்கும்
எண்ணெய் தொட்டிகளும் இதில் அடக்கம்

வெல்டிங் வேலையும்
விவேக சிந்தனையும்

மின் தூக்கி இல்லா மிடுக்கான பயணம்
பாரந்தூக்கி மட்டுமே இப்போது
நம் பாரத்தை தாங்கி

எறும்புகளாய்
எம் உழைக்கும் வர்க்கம்

எண்ணிலடங்கா எண்ணெய் நிறுவனங்கள்
என்னைப் பிரமிக்க வைக்கும் எழில்

பூங்கா போன்ற காட்சி -அதற்கு
புகை மட்டுமே சாட்சி

ஓசோன் காக்கும் ஆசான் -அந்த
ஒரே நாடு சிங்கை

மாசு இல்லை இங்கு -மண்
தூசு இல்லை எங்கும்

பொருளாதாரப் பொழில் -அது
பொங்கிவரும் எழில்

விசாலமான சாலையில்
வாகனங்கள் மட்டும் காற்றுடன்

வெற்றிடத்தை மட்டும் பார்த்தேன்
வேறு யாரும் அங்கு இல்லை

தீயணைப்பு வண்டிகளின்
தியாக அணிவகுப்பு

அவசர நிலைக்கான
அயராத விழிப்பு நிலை

முதலுதவிக்கான
முன்னேற்பாடு

உழைக்கும் வர்க்கமே
உழலும் சொர்க்கமே

வந்தது நமக்கு வியர்வை -அது
தந்தது நமக்கு உயர்வை

குருதி வருமென்றாலும் -அது
இறுதி அல்லவே

உழைப்பு மட்டுமே உறுதி -நம்
உன்னத வாழ்க்கையைக் கருதி

அத்திவெட்டி ஜோதிபாரதி

வார்ப்பு இணைய இதழ் 10.02.2008
திண்ணை இணைய இதழ் 07.02.2008
கீற்று இணைய இதழ்
தமிழ் சிஃபி சித்திரைச் சிறப்பிதழ் 2008

உல்லாசக் கப்பல்

2008-02-29T03:24:00.000-08:00

ஓவியமா அல்லது உண்மையா
ஒரு கணம் அசந்துவிட்டேன்

கடவுச்சீட்டுடன்
கையில் பையோடு

களிப்புடனும் -சில
கற்பனைகளுடனும்

முதல் அனுபவம்
முத்தாய்ப்பாக

நட்சத்திரக் கப்பல்
நற்பயணம்

நுழைவாயிலில்
நல்வரவு வரவேற்பு

கன்னியர்கள் காளையர்கள்
களிப்புடனே

புன்முறுவல் பூத்தார்கள்
நறுமணமும் வீச

படமெடுத்துவிட்டர்கள்
பார்க்காதபோதே

வெள்ளி நிலவு
துள்ளி வரும் நேரம்

வேகமாய் நடந்து
அறை எண் அறிந்து
அழகாய் திறந்தமர்ந்து
அளவளாவினோம்
நிகழ்ச்சிநிரல் கையேட்டுடன்

வழுக்கும் கண்ணாடி
வழவழக்கும் மெத்தை
வண்ண வண்ணத் தரை விரிப்பு

பகட்டை ரசிக்கும் போதே
பயணம் தொடங்கியது தெரியவில்லை

உணவுக்கு ஓரிடமா ஈரிடமா?
நாம் விரும்பும் இந்திய உணவு
நமக்கு பிடிக்கும் சீன உணவு
நமது சாயலில் மலேசிய உணவு
மெச்சும் படி மேற்கத்திய உணவு
சத்துள்ள ஜப்பானிய உணவு

உலகமே இங்கு பணியில்
ஒவ்வொரு நாட்டவரும்
ஒரு தொனியில்

கரீபியன் பாடகர்களின்
கவின் மிகு கானங்களும்

ஆஸ்திரேலிய அழகிகளின்
அரங்கம் நிறை ஆட்டங்களும்

குதிரைப் பந்தையங்களும்
குதூகலங்களும்

சூதாட்டக் கூடத்தில்
சீனர்களெல்லாம் ஐக்கியம்

உற்சாக பானத்துடன்
ஒரு கூட்டம்

அட்டைகள் விளையாட
அட்டைபோல் ஒட்டிக்கொண்டது
ஒரு கூட்டம்

டிஸ்கொத்தே நடனங்களும்
தரை அதிரும் ஆட்டங்களும்

பூப்பந்தாட்டமும்
பூவையர் கூட்டமும்

கூடைப்பந்தாட்டமும்
கோல்ப் விளையாட்டும்

நீச்சல் குளத்தினிலே
நீராடல் உண்டு

இரவுப்பயணத்திலே
எட்டுத்திக்கும் இருட்டு

எட்டிப்பார்த்தால்
எறும்பு போல் படகுகளும்
எங்காவது ஒரு கப்பலும்

நிகழ்ச்சிகளை நெறிபடுத்த
நேரமே கிடைக்கவில்லை

ஓட்டமும் நடையுமாய் -நான்
ஒரு பொழுதும் நிற்கவே இல்லை

எப்படியோ முடிந்து விட்டது
இரண்டுநாள்
எனக்குத் தெரியவே இல்லை

எதுவுமே வாங்கவில்லை
எனக்கு நேரமும் இல்லை

அத்திவெட்டி ஜோதிபாரதி

நல்ல நாளும் பெரிய நாளும்

2008-02-28T18:03:00.000-08:00

புத்தாண்டு வந்தது

பிறந்தநாள் வந்தது

தீபாவளி வந்தது

பொங்கல் வந்தது -அட

அட்சயத் திருதியை கூட வந்தது

அவள் அழுகை மட்டும்

நிற்கவே இல்லை -அவளுக்கு

பொன்னுக்கு வீங்கி!

அத்திவெட்டி ஜோதிபாரதி

கூவத்தமிழன் கூவுகிறேன்!

2008-02-26T04:58:00.000-08:00

அழுக்குகளின் வாசம்

அவலங்களின் குரல்

கொசுக்களின் இசை முரசும்

கொடுக்காமல் குருதி உறிஞ்சும்

படித்து உரை இல் பிறக்கும் குழந்தை

பார் போற்றும் தலைவர்கள் வரும் பாதை

சிங்காரச் சென்னை எல்லாம் வெறும் போதை -நாங்கள்

சிரமாட்டி கேட்டுக்கொள்ளும் பேதை

சுத்த குடிநீர் இல்லாமல் தவிக்கும் -இந்த

கோலத்தை எந்த நாய் பார்க்கும்

கண் குருடாக இருந்தாலும் தெரியும் -நாற்றம்

கண நேரத்தில் நாசியை பிளக்கும்

தொழிற்சாலை சாரம் இங்கு வடியும்

தூக்கம் இன்றி வாழ எப்படி முடியும்

எட்டிப்பார்த்தால் எல்லாம் மாளிகை

எட்டடி குடிசையில் ஏழைகளின் வாழ்க்கை

சாக்கடை சகதி

அதுதான் எங்கள் வசதி

இந்த வாழ்க்கையே பழகிப்போச்சு

இந்த வாசமே வாழ்க்கையாச்சு

அத்திவெட்டி ஜோதிபாரதி

நன்றி:
திண்ணை இணைய இதழ் 28.03.2008
முத்துக்கமலம் இணைய இதழ் 02.04.2008
பதிவுகள் இணைய இதழ் ஏப்ரல் 2008

வாட்?

2008-02-25T13:11:00.000-08:00

வாட்?

ஒரே வரியில் கவிதை தீட்டினேன்

அதற்கு வாட் என்று தலைப்பிட்டேன் -ஆம்

மதிப்பு கூட்டப்பட்ட வரி(VAT - Value Added Tax)

அன்புடன் ஜோதிபாரதி

நானும் வேடந்தாங்கல் பறவை

2008-02-25T05:30:00.000-08:00

நானும் வேடந்தாங்கல் பறவை

வக்கா, முக்குளிப்பான், பாம்புதாரா

பெரிய நீர்க்காகம், சிறிய நீர்க்காகம், கொண்டை நீர்க்காகம்

சின்ன கொக்கு, உன்னி கொக்கு, குருட்டு கொக்கு

செங்குருகு, கம்புள் கோழி, தாழைக்கோழி

நாமக்கோழி, நீர்க்கோழி, மரங்கொத்தி

ஸாண்டு பைப்பர், காமன் டீல், ப்ளூவிங்ட்டு டீல்

பிளமிங்கோ, தூக்கணாங்குருவி, தேன் சிட்டு

கள்ளக்கடையான், கோரைக்கொத்தி - உள்ளான்

காடை, கௌதாரி, கானாங்குருவி - மடையான்

பெயின்டட் ஸ்டார்க், ஓப்பன்பில் ஸ்டார்க், செங்கால் நாரை

காச்சுள், கருங்குயில், புள்ளிக்குயில்

லிட்டில் இக்ரெட், லார்ஜ் இக்ரெட், கேட்ல் இக்ரெட்

மணிப்புறா, மாடப்புறா, பிராமினி கைட்

ஆலா,செந்நாரை, நத்தை கொத்தி நாரை

மைனா, செண்பகம், காதல் சிட்டு

இவர்களோடு நான் மீன் கொத்தி

சைவக்கொக்கு

அத்திவெட்டி ஜோதிபாரதி

ஆடிப்பெருக்கல்ல ஆனந்தப்பட - வெள்ளப்பெருக்கு

2008-02-22T13:08:00.000-08:00

ஆடிப்பெருக்கல்ல ஆனந்தப்பட - வெள்ளப்பெருக்கு

இரவெல்லாம் மழை -ஆம்

இடியும் கூட

இரக்கம் இல்லை இந்த வானுக்கு

உறக்கமில்லை எனக்கு

அன்று நட்ட நடவு மஞ்சநேரி வயலில்

விடியும் வரை காத்திருந்தேன்

காலை இரவை தழுவிக்கொள்ளும் வேளையில்

வெளிக்கிட்டேன் வயலுக்கு மண்வெட்டியுடன்

இளங்காடு கடந்து அறை மணி நேரத்திற்குள்

அடைந்தேன் மஞ்சநேரி எல்லையை

எட்டிப்பார்த்தால் எங்கும் வெள்ளக்காடு

சொல்லி மாளாது என் வேதனையை துயரை

தூரத்து வாய்க்காலில் ஆங்காங்கே நட்ட நாற்று

மிதந்து வரக்கண்டேன்

வந்த கண்ணீரை துடைத்துக்கொண்டேன்

நீயுமா இந்த வெள்ளத்தில் கலக்கவேண்டும் என்று

வயலை நெருங்கினேன் வாய்க்கால் காணேன்

நட்ட நடவு காணேன் வரப்பு காணேன் -அட

நில அளவைக் கல்லையே காணேன்

நிலைகுலைந்து போனேன்

இறங்கினால் இடுப்பளவு நீர்

உணர்ந்துகொண்டேன் ஒரு சாண் பயிரின் நிலையை

பயிரே தெரியவில்லை

வயிறு மட்டும் எரிந்தது

தண்ணீருக்குள்ளேயும்

வாடிய பயிரை கண்டு வாடியவர் வள்ளலார்

இங்கே மூழ்கிய பயிரை கண்டும் வாடினேன்

வரப்புயர நீர் உயரும், நீர் உயர நெல் உயரும்

இங்கே வரப்பும் பயிரும் தெரியவேயில்லை

நீர் மட்டுமே உயர்ந்து நின்றது

வெள்ளத்தனைய மலர் நீட்டம் மட்டும் தானா?

இங்கே பயிர் நீட்டம் கூடாதா?

தண்ணீரை வரவுக்கு மேல் செலவு செய்ய

முடியாமல் வருந்தினேன்

வடிகால் வெட்டலாம் என்றால்

அதுவும் மிதந்து போகிறது

திரும்பிப் பார்த்தேன்

ஏரிக்கு போய் மதகடைப்போம் என்று

மதகடைப்பதென்றால் பலகை இறக்குவதொடு

சில திரை வைக்கோலும்தேவைப்படும் என்று தெரியும்

இருந்தாலும் சென்றேன் மஞ்சநேரியை நோக்கி

போகும் வழியில் தண்ணீரின் வேகத்தை கண்டேன்

இருந்தாலும் சென்றேன் மனம் தளராமல்

ஏரியை நெருங்கியதும் நொறுங்கினேன்

கரை உடைத்து நீர் புரண்டோடுவதை கண்டு

தனக்கியன்றதையும் இயலாததையும் செய்ய முடியா

சொல்லொணாத் துயருற்றேன்

வீட்டுக்கு பயணித்தேன் -வழியில்

வந்த யாரையும் பார்க்கவில்லை

யாரும் வயலைப்பற்றி கேட்டால்

பதிலுரைக்க வெட்க்கப்பட்டு

மஞ்சநேரி வயல் எப்படி இருக்கிறது?

அம்மா கேள்விக்கு அயர்ந்து போய்

அமர்ந்தேன் சொல்லற்றவனாய்

பதிலுரைத்தேன் கண்ணீர் துளிகளாக

அடுத்தவருடம் பார்த்துக்கொள்ளலாம் என்ற

அம்மாவின் தேற்றுதல் வரிகளுடன்

ஆறுதல் அடைந்தேன்

என் உள்மனசு சொன்னது

எத்தனை முறைதான்

இந்த வரிகளை கேட்டு ஆறுதல் அடைவது என்று…

அத்திவெட்டி ஜோதிபாரதி
சிஃபி தமிழ் 2008 பொங்கல் சிறப்பு மலரில் பிரசுரமாகியுள்ளது

வலைப்பூ!

2008-02-21T23:28:00.000-08:00

வலைப்பூ!

என் பூக்கள்

பூத்த உடனே

சந்தைக்கு வருகின்றன

வியாபாரம் இல்லை

விலை நிர்ணயம் தேவையில்லை

தரகு இங்கு இல்லை

திருப்பி அனுப்பும் பழக்கம் இல்லை

தமிழ்ப் பூக்கள் பயிர்செய்யும்

நானும் விவசாயிதான்!

அத்திவெட்டி ஜோதிபாரதி

தொலைத்தேன்

2008-02-20T05:33:00.000-08:00

தொலைத்தேன்

தூக்கம் தொலைத்தேன்

துவண்டு தொலைத்தேன்

ஆக்கம் தொலைத்தேன்

அழுது தொலைத்தேன்

மகனைத் தொலைத்தேன்

மகிழ்ந்து தொலைத்தேன்

வீணாய்த் தொலைத்தேன்

வீங்கித் தொலைத்தேன்

மயங்கித் தொலைத்தேன்

மாறித் தொலைத்தேன்

நேரம் தொலைத்தேன்

நெகிழ்ந்து தொலைத்தேன்

நாணம் தொலைத்தேன்

நகைத்துத் தொலைத்தேன்

படிப்பைத் தொலைத்தேன்

பயந்து தொலைத்தேன்

உணவைத் தொலைத்தேன்

ஊக்கம் தொலைத்தேன்

கனவைத் தொலைத்தேன்

கனிவைத் தொலைத்தேன்

நனவைத் தொலைத்தேன்

நைத்து தொலைத்தேன்

பாசம் தொலைத்தேன்

பார்வை தொலைத்தேன்

நேசம் தொலைத்தேன்

நெருக்கம் தொலைத்தேன்

தொலைத்தேன் தொலைத்தேன்

தொலைக்காட்சி பார்த்துத் தொலைத்தேன்

அத்திவெட்டி ஜோதிபாரதி

என் தாய்த்தமிழகமே!

2008-02-20T05:27:00.000-08:00

ஈழம் என்பது ஈரநிலம்

அதன் தூரம் தெரியுமா உனக்கு?

பாரம் குறைவதற்குள்

படித்து தெரிந்துகொள்

ஐயம் இருந்தால்

பையத் தெரிந்துகொள்

இனவாடை மறந்தாலும் -உனக்கு

பிணவாடை தெரியாதா?

இதயம் அடைத்ததோ

மூக்கு அடைத்ததோ -அல்லது

இரண்டும் தானோ?

செஞ்சோலைக் குயில்கள் பலியான போது -நீ

பஞ்சாக பற்றாமல் துயில் கொண்டதேனோ?

பாருக்குச் சொல்லாமல் பதுங்கி இருந்ததேனோ?

நடந்தது நடந்தவையாக எண்ணி

நடப்பவை நல்லவையாக மலர

துடிக்கும் இதயம் ஈழம்

என்று துடிக்கட்டும்

நொடிக்கும் விதையும் -நல்

தமிழ் ஈழம் கொடிகட்டும் - தமிழா

இழுக்கு வருவதற்குள் - உன்

அழுக்கு தேய்த்துக்கொள்!

அத்திவெட்டி ஜோதிபாரதி

வணக்கம்!

2008-02-20T04:39:00.000-08:00

வணக்கம்!

அனைத்து தமிழ் உள்ளங்களுக்கும்,
தமிழ் வலை உலக நண்பர்களுக்கும்,
கவிஞர்களுக்கும்,
எழுத்தாளர்களுக்கும்
அன்பு வணக்கம்.
எனது உணர்வுகள்
கவிதையைப் போல்
அவ்வப்போது வெளிப்படும்.
அவைகளை இங்கு
புனையலாம் என்று இருக்கிறேன்.
உங்கள் ஆதரவை நாடுகிறேன்.

வருகின்ற உணர்வுகளைக்
கவிதைகளாய் வைக்காமல்
கொட்டிவிட வார்த்தேடுத்தேன்
இந்த வலைப்பூ,
வையத்து மாந்தர்கள்
வரவேற்பர் என.
நம்பி,
அத்திவெட்டி ஜோதிபாரதி.